Интервију

Интервју на амбасадорката Џилијан Миловановиќ за Алсат М телевизија

 

25 јануари 2007

Интервју на Алсат М телевизија: (зголемена фотографија)	Интервју на Алсат М телевизија: (зголемена фотографија)

Амбасадорката Миловановиќ: Многу ви благодарам, г. Зекири, мило ми е што сум овде, ви благодарам на поканата.
 
АЛСАТ М: Како гледате на најавата на албанските партии во опозиција за бојкотирање на работата на Парламентот?
 
Амбасадорката Миловановиќ: Мислам дека е тоа, прво, некорисна одлука -- ако биде потврдена, затоа што јас разбрав дека се уште не е потврдена, барем не од страна на ДУИ.  Некорисна е затоа што, да бидам искрена, сметам дека луѓето гласале за ДУИ и за ПДП за да имаат свои претставници во Парламентот, луѓе што ќе работат во нивно име во националното собрание, и мислам дека е тоа местото каде што можат најмногу да придонесат на тој начин што практично ќе учествуваат во политичките дебати; во изминатите 4 години, како и во последните 3 и пол месеци, тие покажаа дека се способни за тоа; и мене ми се чини дека токму таму им е местото. 
 
Е сега, се разбира дека во демократска смисла секој има легитимно право да не се појави на некоја седница на Парламентот. Јас сепак се надевам дека до тоа нема да дојде, зашто сметам дека Македонија ја чека уште многу работа, и дека ДУИ и ПДП можат многу да придонесат во тој процес.
 
АЛСАТ М: Аргументот на ДУИ и ПДП за бојкотирање на Парламентот е непочитувањето на Бадинтеровото мнозинство. Дали овој аргумент е прифатлив за вас?
 
Амбасадорката Миловановиќ: Во суштина се работи за следново: Се разбира дека Рамковниот договор претставува критичен елемент во процесот на развој на Македонија, елемент од исклучителна важност за нејзината иднина; тоа е елемент што ќе го земат предвид земјите-членки на НАТО кога ќе решаваат дали Македонија ги достигнала стандардите што се неопходни за членство во НАТО, и сметам дека во последните неколку години Рамковниот договор и неговото имплементирање докажаа дека претставуваат позитивен фактор во придвижувањето на земјата напред, во вткајувањето на различните етнички и политички заедници, и сметам дека е многу важно тој Рамковен договор да се движи напред, да биде имплементиран во целост. Кога го велам ова, сметам дека  регуларните политички институции се вистинското место за дискусии по прашања како што е Рамковниот договор, понатаму кога е потребно да се примени Бадинеровото мнозинство, дали тоа соодветно се почитува - значи тоа е местото каде што би било добро да се одвиваат ваквите дискусии. Би додала дека, од гледна точка на САД, а ние ова многу пати сме го кажале, како потписници на самиот Рамковен договор, сметаме оти е важно да се спроведува словото на Рамковниот договор, но исто така и неговиот дух, и јас сметам дека е важно во иднина и на тоа да се обрне внимание. 
 
АЛСАТ М: Како гледате на улогата на владеачките партии кај нас?  Се чини дека нема доволно политичка волја да се земат во предвид барањата на опозицијата.
 
Амбасадорката Миловановиќ: Искрено, сметам дека на сите партии, независно дали се тоа партиите во Владата или партиите во опозицијата или надвор од Владата, од некоја причина им е тешко да работат заедно за доброто на земјата. Не се сомневам дека секоја партија поединечно навистина и го сака доброто на својата земја, но во практична смисла тие не изнаоѓаат начин како тоа да го остварат, а особено нема волја да се исчекори подалеку од декларативните изјави од типот „треба да се разговара”, и фактички да се оди напред, да се остварува дијалог што ќе води кон конкретни резултати. Ова се уште го нема. И, морам да признам, ова е нешто што не загрижува. Зашто времето е многу кратко; има многу малку време до разгледувањето во НАТО и, иако се разбира мојата земја не е членка на ЕУ, би се осмелила да кажам дека се скратува времето до следното разгледувањето во ЕУ за можното започнување на преговорите за членство на Македонија. Затоа, сметам дека е навистина многу важно сите партии, не само партиите што не се во Владата, ниту пак само оние што се во Владата, да започнат да сфаќаат дека политиката во својата суштина претставува уметност на можното – не може да имате се, но можете да преговарате едни со други за да постигнете некаков компромис, некаква спогодба, на транспарентен и отворен начин, што ќе ви овозможи вие да добиете нешто од тоа што го сакате, да и дадете на другата страна нешто од тоа што таа го сака, и заедно да ги придвижите работите напред. Зашто ако секоја страна и натаму инсистира да добие 100% тоа што го сака, а јас сметам дека, за жал, такви се овде тенденциите, тогаш никој ништо нема да добие, секој ќе добие 0%, а тоа не е добро за земјата. 
 
АЛСАТ М: Постојано се бара од политичките партии да започнат политички дијалог.  Дали сте оптимист дека ова може да се случи наскоро? 
 
Амбасадорката Миловановиќ: Оптимист сум во смисла дека одбивам да бидам песимист. Сметам дека е бескорисно да се биде песимист, и навистина верувам дека Македонија во минатото– и покрај тешкотиите, дури и оние што понекогаш самата си ги создава – на импресивен начин успевала да оди напред и да ги решава проблемите. Затоа во таа смисла, јас сум оптимист. Се надевам дека и партиите во опозиција, и оние во Владата ќе сфатат, особено мислам на лидерите на клучните, на најголемите, партии -- не сакам да ги омаловажувам помалите партии -- но големите партии навистина ќе одиграат клучна улога во придвижувањето на работите од сегашнава ситуација. Се надевам дека лидерите на овие партии ќе сфатат дека е дојден моментот да се донесе таа одлука, да се сплотат и сериозно да работат, своите разлики да ги разрешат доволно успешно за да можат да ја придвижат земјата напред.
 
АЛСАТ М: Зошто политичките лидери во земјава не можат да седнат на маса без присуство на меѓународниот фактор? Нивниот последен состанок се одржа по ваша иницијатива и на амбасадорот Фуере.
 
Амбасадорката Миловановиќ: Мислам дека тие можат да седнат заедно без присуството на меѓународната заедница, мислам дека беа остварени повеќе средби на различни нивоа – не беа сите на ниво на лидери на партии – без присуство на претставници на меѓународната заедница, но во секој случај сметам дека премногу се нагласува ова прашање околу присуството на меѓународната заедница. Да ви кажам искрено, кога со амбасадорот Фуере седевме на двете средби на кои присуствувавме, ние двајцата таму буквално само седевме и ги следевме дискусиите, и на крајот се обидовме да направиме еден синопсис, едно резиме, за сите учесници да си заминат со усогласени ставови околу она за што се дискутираше; меѓутоа, ние не учествувавме активно во дискусиите затоа што ние не би ни требало да имаме таква улога. Затоа, сметам дека луѓето се способни без нас да остваруваат средби. Меѓутоа, она што сакам да го кажам е дека ниту еден разговор нема да вроди со плод без взаемна доверба, а во овој момент важно е да се изнајде начин да се договори дискусија каде ќе има доверба и ќе може да се разговара, и тука во некои случаи можно е да има потреба од извесно инволвирање на меѓународната заедница, можеби не на самите состаноци, можеби преку разговор со партиите пред да се состанат. Останува да се види како ќе се одвива тоа. За тоа решаваат самите партии, ниту амбасадорот Фуере, ниту јас не можеме да одлучиме дека тие треба да присуствуваат таму, тоа е навистина нивна одлука.
 
АЛСАТ М: Проблемите настанаа по парламентарните избори, кога ДУИ, којашто беше победник во албанскиот политички блок, не стана дел од владата.  Од оваа перспектива, дали мислите дека Груевски направи грешка со тоа што ја остави оваа  партија во опозиција?
 
Амбасадорката Миловановиќ: Не мислам дека се работи за грешки. Како што веќе неколку пати сум кажала, сметам дека вашиот устав и вашите закони овозможуваат – како и во многу други европски држави – онаа партија што е најголема и што ќе го добие мандатот да формира влада да има право да ја формира владата со оној што таа смета дека сака да се придружи и да ги исполни критериумите на таа партија. Затоа, ни во смисла на Рамковниот договор, ниту во смисла на вашиот устав, не сметам дека постоеше законска обврска ДУИ да влезе во Владата. Е сега, тоа е јасно, но тука доаѓаме до духот на нештата: има слово Шна законотЌ и има дух. Духот е дека тука нема дилема – мнозинството етнички Албанци граѓани на Македнонија гласаа за коалицијата ДУИ/ПДП. Тоа што ДУИ и ПДП не се во Владата не значи дека не се слуша гласот на овие гласачи и дека е нивното гледиште ирелевантно. И мислам дека за едноставна политика во нормални околности би требало да се земат предвид и нивните ставови и да се најде соодветен механизам за инкорпорирање на тие ставови, и – кога сме кај ова – истото да се однесува и за ставовите на СДСМ и на помалите партии што не се во Владата.
 
АЛСАТ М: Од Хаг беше најавено дека четирите случаи за кои Трибуналот не покажа интерес можеби ќе бидат вратени во Македонија.  Колку Македонија е спремна да ги процесуира овие случаи и дали ова може да предизвика нови тензии во земјата?
 
Амбасадорката Миловановиќ: Ќе почнам од крајот на вашето прашање – би рекла дека не предвидувам дека враќањето на предметите ќе предизвика тензија. Мислам дека предметите несомнено ќе бидат вратени штом ќе биде завршен поголемиот дел од работата во судството, за да биде сигурно дека тоа судство е подготвено да ги преземе овие предмети.  Би сакала јасно да кажам дека, се разбира, тоа не се предмети по кои се покренати обвиненија, не станува збор за предмети што се целосно испитани, за сите овие предмети не се знае дали ќе бидат покренати судски постапки или не, што е дел од процесот што ќе треба да продолжи кога овие предмети ќе бидат вратени. Но, сметам дека сега е битно крајно сериозно да се продолжи со реформата на судството, а ова е област во која САД помага многу активно, ОБСЕ е многу активно, инволвирана е и ЕУ, како и голем број други институции на билатерална основа. Се уште претстои многу работа. Досега имате постигнато значаен напредок во реформата на судството во поглед на гласањето и на легислативата, многу нешта треба да се имплементираат и треба да се извршат многубројни конкретни подготовки и обука во врска со можните видови предмети ако некогаш дојде до тоа вие да треба судски да гоните некого чиј предмет е вратен од Хаг, а на кој се уште треба да се работи.  
 
АЛСАТ М: Освен проблемите помеѓу владеачките партии и оние во опозиција, имаме и заладени односи помеѓу премиерот Груевски и петседателот Црвенковски.  
 
Амбасадорката Миловановиќ: Па, морам да кажам дека, како Американка, ова малку ме збунува, малку ми е чудно, зашто, се разбира, за нас е нормално да постои она што вие го нарекувате кохабитација – претседателот да е од една партија, а еден или двата дела од нашиот Парламент, Конгресот, да се од друга партија.  Се разбира, токму таков е случајот сега, во овој момент, и во Сенатот и во Претставничкиот дом, каде што новоизбраното мнозинство е од редовите на демократската партија, а нашиот претседател е од републиканската партија. Но тоа нешто – различните политички партии или разликите во ставовите – огромните разлики во ставовите околу политиката – нема да бидат причина за, на пример, да не се присуствува на годишното обраќање на претседателот – тој неодамна го имаше своето обраќање. Сите дојдоа да го слушнат. Затоа ми е малку чудно што постои овој проблем, една институција да има проблем во остварувањето соработка со друга институција. Јасно ми е дека има поделби на политичко ниво – таков е случајот и во нашата земја – републиканците можат воопшто да не се согласуваат со политиката на демократите, и обратно; но тоа не се пренесува на институциите. И мислам дека во земја со релативно нови институции, каков што е случајот со Македонија, особено е важно институциите да се поддржуваат и да се почитуваат.
                       
АЛСАТ М: На крајот од минатата година, Македонија беше потресена од неколку големи афери.  Онаа со шверцот на оружје, демолирањето на дискотеката Процес, и нападот на вооружени лица на Нота Фест.  Како гледате на овие настани? Колку овие, и слични, случаи му штетат на имиџот на земјата во нејзините евро-атлантски интеграции?
 
Амбасадорката Миловановиќ: Како прво, ако ми дозволите, би сакала да коригирам една работа во тоа што го рековте - ние не сметаме дека е ова случај на шверц со оружје. Ние сметаме дека овде се работи за случај во кој одредено количество оружје било натоварено во неколку камиони и дека за тоа оружје имало несоодветна документација, и дека е нејасно зошто патувале овие камиони. Но, на ова не гледаме како на случај со шверц со оружје. Тој случај, на пример, се наоѓа пред судот, и понатаму не би одела во други детали.
 
Она што, генерално ми падна в очи и донекаде претставува извор на загриженост – а што и го напоменав и на министерката за внатрешни работи која ме уверуваше дека таа заедно со припадниците на полицијата навистина прават напори – е тоа што, во време кога Македонија настојува да се изгради како бренд, да изгради свој имиџ во светот, да привлече инвеститори, да докаже дека е подготвена за влез во НАТО и ЕУ, едно нешто што отсекогаш било природна одлика на оваа земја е тоа што таа не била извор на насилнички криминални испади на улиците, дека е ова земја каде што луѓето не мораат да се грижат кога нивната младина  ќе излезе во град за да се забавува. Фактот дека неколку инциденти – Процес, Универзална сала, претепувањето на луѓето што сакаа да постават цвеќиња на споменикот на кејот – тоа што такви работи се случија во центарот на Скопје не е добро. Тоа е нешто на кое мора многу бргу да се реагира и да се преземат чекори, да се пронајдат сторителите, да се дадат на суд за да може брзо да се покренат обвиненија и судовите да си ја завршат својата работа, да не се чека, да не се играат играчки, зашто со брза реакција ќе се одвратат и ќе се спречат други луѓе да направат вакви работи, гледаме дека имаше казни, а тоа ќе им влее доверба и на оние што на оваа ситуација гледаат како на ’исклучок, Скопје и Македонија се уште претставуваат мирно место, како што ги знаеме’. А ова е многу важно за вашиот имиџ, тоа е позитивен поен за афирмирање на државата што не треба да дозволите да го изгубите. 
 
АЛСАТ М: Во една полициска акција на крајот од минатата година беше запленето големо количество на кокаин и пресечена голема мрежа за трговија со дроги.  Во колкава мерка оваа акција беше водена во соработка со институциите на САД?
 
Амбасадорката Миловановиќ: Колку што јас знам, Агенцијата за борба против дрогата беше многу задоволна од она што Министерството за внатрешни работи го направи и веројатно од вашата царинска служба – не ми се познати деталите кој се беше инволвиран во овој случај. Знаеме дека во сето ова донекаде беше вклучен регионот, но за нас е најважно тоа што операцијата на запленување беше одлично изведена, сите професионалци што учествуваа во неа одлично си ја извршија својата работа, со што ние бевме многу, многу задоволни, како и со запленувањето на марихуаната што беше изведено подоцна во одделна операција.
 
АЛСАТ М: Кои се најголемите предизвици со кои Македонија ќе треба да се соочи оваа година?
 
Амбасадорката Миловановиќ: Мислам дека најголемите предизвици се оние очигледните, за кои веќе доста зборувавме. На ова гледам од перспектива на НАТО. Мислам дека Македонија навистина има можност во 2008 година да добие покана за членство во НАТО, но исто така сметам дека времето е се пократко за да се заврши работата што е неопходна за да се постигнат стандардите на НАТО. САД многу цврсто стои зад кандидатурата на Македонија, но ние исто така треба да сме во можност да видиме дека работата е сработена и, се разбира, тука се и 26-те земји-членки на НАТО, што сите исто така треба да решат дека вистинската работа е сработена. Оттука, сметам дека е тоа најголемиот предизвик – да се направи сето она што е неопходно за да се покаже дека земјата е подготвена за НАТО, и би рекла дека тоа делумно се однесува и на стандардните работи за кои зборуваме, а тоа се истовремено и голем дел од работите што ќе треба да ги направите за членство во Европската Унија – унапредување на економијата, унапредување на судскиот систем, подобрување на состојбата со трговијата со луѓе, верски закон што овозможува целосна верска слобода, зајакнувања на вашиот демократски систем – се разбира, се се тоа клучни прашања, како и континуирана и целосна реформа на одбраната. Но, уште една работа што јас сметам дека е особено важна, а е во врска со политичката клима во државата, е да се реши прашањето на партиската политичка клима, на релацијата меѓу Владата и оние што не се во Владата, така што секоја земја-членка на НАТО што ќе треба да гласа со ’да’ или со ’не’ за прием на Македонија нема да гледа на вас како на земја што само декларативно ги застапува заедничките вредности на земјите-членки на НАТО, туку како на земја што живее согласно тие вредности, дека тие вредности се реалност во вашата земја. Ете, тоа се тие предизвици.
 
АЛСАТ М: Од Самитот на НАТО во Рига беа испратени јасни сигнали дека Македонија, Хрватска и Албанија можат да очекуваат покана за членство во НАТО во 2008 година.  Коклу овие земји се подготвени за влез во НАТО и дали е сигурно дека нивните аспирации ќе бидат остварени, така што во 2008 тие ќе добијат покана за членство во НАТО?
 
Амбасадорката Миловановиќ:  Во Рига беше речено дека има одлука дека НАТО сака да врачи конкретни покани на оние што се подготвена за тоа, и дека би сакале тоа да го направат на самит што би се одржал во 2008 година. Е сега, беше искажана многу силна поддршка за Хрватска, како и извесна поддршка за Македонија и за Албанија. За сите случаи, се уште претстои оценување што ќе го изврши како самиот НАТО, така и секоја земја-членка одделно, за да се види дали тие сметаат дека секоја од овие држави, гледани поединечно – не како група – гледани поединечно, ги исполниле критериумите. Дали има гаранции дека Македонија ќе успее, или Хрватска, или Албанија? Не, нема гаранции. Нема гаранции се додека не се заврши сето она што треба да се сработи, се додека НАТО и секоја земја-членка одделно не ја разгледаат земјата и не речат ’да, оваа земја ги исполнува критериумите’, и токму поради ова велам дека е толку важно да се сосредоточите на овие прашања. Едно – што мислам дека се уште не им е доволно јасно ниту на Владата ниту на опозицијата – е дека времето е кратко и затоа навистина треба да се сосредоточите на суштинските работи. Голем е бројот на работите што и опозицијата и Владата би сакале да бидат преточени во закони. Има многу работи што тие би сакале да се имплементираат. Меѓутоа, од сега па, да речеме, до крајот на годината, кога НАТО ќе ја донесува својата одлука, и кога ЕУ ќе решава во врска со започнувањето на преговорите во иднина, ова е времето кога треба да се сосредоточите исклучиво на оние работи што ќе ви помогнат во овие кандидатури, а другите работи да ги оставите за подоцна, ќе има доволно време и за нив. 
 
АЛСАТ М: Како гледате на улогата на Македонија во глобалната војна против тероризмот? Нашите војници се дел од меѓународните сили во Авганистан и Ирак.  Колку ова помага на аспирациите на нашата земја да стане членка на НАТО?
 
Амбасадорката Миловановиќ: Како прво и најважно, би сакала да ја искажам нашата благодарност, како САД, за учеството на Македонија – и тоа за така доследното учество, со извонредни војници – во борбата против терористите; вашето учество во Авганистан, сега се тоа некаде околу 150 луѓе, потоа околу 40 во Ирак, и вие постојано испраќате свои луѓе, и сега имате, мислам, и околу 30-ина во Босна. Тоа е огромна работа, солидарноста што ја покажувате, и тоа значи дека сте свесни оти, иако овие конфликти се наоѓаат далеку од вашата држава, тоа се конфликти што всушност би можеле, во најлош случај, и вас да ве погодат, и да имаат негативно влијание врз вашата иднина, и дека сакате да спречите тој проблем да земе поголем замав. Затоа, сметам дека, општо земено, сето тоа е многу позитивно, а тоа е секако и придонес што ние многу го цениме, всушност, оваа недела врачив медали на некои војници што учествуваа во вашите единици во Ирак.
 
АЛСАТ М: Освен во НАТО, Македонија сака да стане членка и на ЕУ.  Каква е вашата оценка за ова? Кога може да очекуваме да добиеме датум за почеток на преговотите за членство во ЕУ?
 
Амбасадорката Миловановиќ: Знаете, да бидам искрена, јас навистина не можам да ви одговорам на тоа прашање. Тоа е прашање во врска со ЕУ, тие си имаат своја методологија и би било неумесно од моја страна да го дискутирам тоа.
 
АЛСАТ М: ЕУ најави дека до крајот на оваа недела ќе ја потврди црната листа на лица на кои не им е дозволен влез во земјите на ЕУ.  Американската администрација има слична листа на која се наоѓаат политичари на кои им е забранет влез во САД.  На оваа листа е и потпретседателот на ДПА, Мендух Тачи.  Може  ли да очекуваме ревизија на листата оваа година?
 
Амбасадорката Миловановиќ: Како прво, би сакала да појаснам дека, всушност, ние немаме црна листа иако е тоа прифатено како вообичаена терминологија; ние имаме список на лица што немаат активно право на виза.
 
Кога го велам ова, во Вашингтон постои систем на ревидирање на овие списоци. Но, тоа не е како со списоците на ЕУ, тоа не е ревизија што се врши еднаш годишно, така што не знам кога ќе се врши наредната ревизија а, колку што знам, таа листа во моментов останува непроменета.
 
АЛСАТ М: Како гледате на односите на Македонија со соседните земји? По преименувањето на скопскиот аеродром во Александар Велики повторно на површина излезе тензијата со официјална Атина.
 
Амбасадорката Миловановиќ: Како прво, мислам дека е важно тоа дека Македонија бележи многу добри односи со своите соседи и дека, и покрај спорот околу името со Грција, во последниве неколку години мислам дека се вложени  решителни напори подобро да се запознаат лидерите на околните држави – било да се работи за Албанија, Бугарија или Грција – и вистински напори да се покаже дека сите можат добро да се слагаат. И сметам дека е многу важно тоа да продолжи.
 
Уште еднаш, сметам дека она што е важно овде е да се фокусирате на суштинските прашања, а што се однесува до аеродромот, не можам да зборувам во име на Грците, Грците зборуваат во свое име.  Јас би кажала дека има одреден број на други практични работи на кои треба да им се обрне внимание, лично не сум сигурна дека преименувањето на аеродромот претставуваше врвен приоритет, но тоа е сега завршено и продолжуваме понатаму.
 
АЛСАТ М: Грција постојано ја повторува заканата дека ако не се реши прашањето со името, тие ќе го блокираат членството на Македонија во НАТО и ЕУ.  Дали мислите дека ова може да се случи?
 
Амбасадорката Миловановиќ: Мислам, како прво – и повторно, на Грците останува да го изнесат својот став. Во 1995 година беше потпишана една привремена спогодба во врска со именувањето на Македонија во меѓународните организации како Бивша југословенска република и, колку што знам јас, и колку што е општо познато, овој преоден договор целосно се применува. Е сега – пак ќе кажам, добрите меѓусоседски односи подразбираат мудри постапки, тие значат добра политика и иако јас целосно очекувам дека тој договор ќе се почитува, би било добро, покрај повикувањето на меѓународни договори, да се одржуваат и добри односи со соседите. 
 
АЛСАТ М: Во Србија неодамна се одржаа парламентари избори на кои повторно победија радикалните сили.  Во меѓувреме, се очекува демократските сили да формираат влада.  Како гледата на изборните резултати во Србија?
 
Амбасадорката Миловановиќ: Од она што можевме да видиме, иако е точно тоа дека за радикалната партија гласаше најголема група граѓани, демократските партии всушност освоија најголем број гласови. Значи, гледаме една Србија што масовно гласаше за својата европска и демократска иднина. Тоа многу не радува. Се разбира, домашната политичка сцена во Србија и натаму ќе биде сложена, ќе треба да смислат како да формираат влада, но позитивно е тоа дека на гласање излегоа толку многу граѓани, а многу од нив излегоа на гласање за да се обезбедат дека Србија ќе има своја иднина во Европа, и тоа демократска иднина. Ете, ние така гледаме на ова прашање. 
 
АЛСАТ М: Во меѓувреме се очекува предлогот на Ахтисари за конечниот статус на Косово. Дали мислите дека во Србија ќе има политички сили кои ќе бидат спремни да го прифатат предлогот на Ахтисари?
 
Амбасадорката Миловановиќ: Се разбира, ние се надеваме дека сите страни што учествуваат во преговорите што се одвиваат под покровителството на ОН, предводени од претседателот Ахтисари – се надеваме дека сите сили што учествуваат во преговорите, ќе гледаат на неговите предлози со добра намера, дека за финалните детали ќе преговараат со добра намера и дека ќе изнајдат решение со кое сите ќе бидат задоволни. Се разбира, ние целосно ги поддржуваме иницијативите на Ахтисари, и ќе продолжиме да подджруваме предлози што ќе ги исполнуваат основните критериуми и ќе гарантираат демократска иднина, почитување на човековите права, почитување на културните и верските објекти, и конечен статус што ќе ги почитува безбедноста и суверенитетот на соседните држави, а тоа ќе биде најважно. Се додека се постигнува сето ова, и се додека она што ќе произлкезе ќе биде во согласност со волјата на народот на Косово, верувам ние и понатаму тоа ќе го поддржуваме.  
 
АЛСАТ М: Како го оценувате ставот на македонските власти околу статусот на Косово?
 
Амбасадорката Миловановиќ: Сметам дека она што е многу позитивно, а го гледам уште од почетокот на мојот мандат во Македонија, а мојот мандат опфаќа две влади, е ставот дека ова не е партиско прашање, дека ова е прашање што е важно за вашата земја, да се биде солидарен со Обединетите Нации, со САД, со Контакт-групата, да се напредува со предлозите на Ахтисари и да се дава поддршка на она што ќе произлезе од заложбите на меѓународната заедница. И мислам дека е тоа многу важно.  Другата работа што мислам дека е, и дека и понатаму ќе биде, важна во поглед на инволвираноста на Македонија во статусот на Косово, е тоа што Македонија и понатаму е во можност да ја игра улогата, што де фацто ја игра, на модел на успешна мултиетничка унитарна демократска држава. Тоа не е мал успех. Тоа претставува огромен успех за кратко време и мислам дека во моментот кога Косово, со својот финален статус, ќе почне да се организира и да ги решава своите прашања, ќе биде многу битно да се граничи со земја во која системот функционира, во која политиката и  мулти-етничката држава функционираат. Во врска со Косово треба да го кажам и тоа дека, се разбира, ставот на САД во врска со демаркацијата на границата – што знам дека е многу важно за Македонија – е дека ние ова го гледаме како техничко прашање, и сметаме дека тоа треба да биде дел од Договорот за конечниот статус. 
 
АЛСАТ М: Што мислите, дали се можни тензии во регионот по објавувањето на предлогот на Ахтисари?
 
Амбасадорката Миловановиќ: Искрено, не гледам причина за тензии, мислам дека единствената причина поради која воопшто почнаа преговорите за статусот е сознанието дека овој регион треба да се движи напред и да се создаде ситуација во која луѓето ќе живеат со чувство дека за нив има иднина, дека има иднина за целиот регион, дека ќе станат попривлечни за инвеститорите, што како резултат ќе донесе поголема економска динамика. Ние очекуваме дека со решавањето на статусот на Косово ќе се реализираат сите овие работи, така што не гледам причина за создавање тензии – ситуацијата би требало да предизвикува убави чувства. 
 
АЛСАТ М: Каква ќе биде позицијата на администрацијата на САД околу финалниот статус на Косово?
 
Амбасадорката Миловановиќ: Нема да го предвидувам нашиот став, ќе почекаме да видиме со каков предлог ќе истапи амбасадорот Ахтисари, а потоа заедно со другите членови на контакт-групата ќе го разгледаме многу внимателно.
 
АЛСАТ М:
 
Амбасадорката Миловановиќ: Ви благодарам уште еднаш за поканата, навистина ми беше задоволство што имав можност денес да разговарам со вас.